好嬲呀！

好嬲呀！好嬲呀！好嬲呀！

今日查簿，呢幾日已經冇覺好瞓，今日仲要俾幾個死唔交功課、交又交一半既自私精激到七孔生煙，誓神劈願話交左，等我翻箱倒籠同你地搵，仲話我整唔見你地D功課，結果根本未交，又誓神劈願話聽日一定交到，結果又係講大話！我仲要IE地氹你地同你地慢慢傾，傾完又係咁！一次又一次既傷我心！迫到埋牆嘞，就愛死咁同我講唔想做，我夠唔想改咯！點解你地可以遲交功課，我唔可以遲交簿？要你地交功課好似殺左你地全家咁，自己既責任唔盡，仲搞到人雞犬不寧，到成績唔好嘞，就賴老師冇料到，唔夠嚴！嚴果D又比你地改花名，又話人上堂悶！

可惡！！！

得返半條人命仲要傷一傷真氣，見好耐冇煮過飯，就死去街市諗住煮餐飯慰勞下自己，點知……

我得32蚊晌銀包，諗住唔煲湯，2條友食應該都夠，屋企仲有包雪藏雞亦，買D薯仔、洋蔥整蠔油雞亦，羊生唔食魚，不過抽起條筋想買條黃花自己食，見D脆玉瓜又幾平，買兩個……

得返9蚊！嘩，陰公，幾樣野就買左23蚊，難為D赤貧朋友，都唔知點煮俾一家大細食！

得返9蚊，買咩煮脆玉瓜好呢？

我晌街市兜左3個圈，卒之比我發現一舊細細舊既墨魚，咁細舊唔使9蚊啩！

「呢舊幾錢呀？」

「2蚊兩。」

雖然我問完都唔知舊野幾錢，不過斷估冇4兩咁重啩？

「呢舊啦！」

賣魚師奶以瞬雷不及掩耳既手法執左舊墨魚落袋，仲俾我眼尾梢到佢執左舊墨魚鬚落袋，正當我想問點解時候，佢已經又以瞬雷不及掩耳既手法磅埋劈到我見前。

「13蚊啦！」

「M…… 我要去禁一禁錢，轉頭過黎攞丫！」心諗13蚊都冇就實在係欏左D，不過都唔同佢理論個墨魚頭嘞。

「下？你有幾錢呀？」唔通諗住豪俾我？

「得9蚊！」我打開手板。

佢突然用佢戴住痴滿魚鱗既手套既手立左我手上既幾個大餅：「呢度9蚊，你禁完錢俾埋果4蚊啦！」跟手將我既墨魚劈埋一邊。

有團火湧到我心口，我覺得好屈辱！不過9蚊同墨魚都晌佢手上，我死死氣去禁錢。

越諗越慶！

有乜理由咁樣搶人D錢！我望住手掌心既半塊魚鱗， 越諗越慶！

我暗暗祈求文文姐同阿珊賜我勇氣！

返到魚檔，佢笑口西西，我黑住面：「你係咪執左舊鬚入去？」

「係呀，買墨魚要搭條鬚架！」

我冇追問點解我買咁細細舊都要買埋佢個頭，我好肯定個頭仲重過我要果舊身：「算啦！咁都唔使搶我D錢架係嘛？」

「唔好咁講！好多人話轉頭返黎都唔返架！」

「咁都唔使搶我D錢架係嘛？」真係唔係同佢計果幾蚊，係佢既態度！

「唔好咁講！唔好搶搶聲咁難聽！」佢開始想發爛炸。

「唔係搶？D錢晌我手度，我有話俾你咩？你一手搶左去，我隻手仲有塊魚鱗呀！幾蚊俾你有乜所謂喞，不過咪使旨意我以後會幫襯你囉！」講完頭也不回，閃！

點解差唔多次次去街市都俾人恰？？？

點解我要同個師奶晌街市為左幾蚊嗌烚起黎？？？

點解？？？

我而家好大膽架！唔好恰我！

我唔係師奶！！！我唔係！！！