神奇中醫師

昨天下班，天空下著毛毛細雨，我穿著短裙仔跳上羊先生的烈火戰車，多得姊妹小丸介紹，到大埔尋找隱世醫術。

找了又找，終於找到一個毫不起眼的住宅單位，一位四眼嬸嬸開了門，破舊的單位內坐著一對情侶、兩個撐著拐杖的中年人及一個朦豬眼肥仔，電視組合櫃排滿醫學獎座，櫃旁的儲物架上整齊地堆砌著一個個泥黃色的藥樽。

肥哥哥看了看我，問：「你係……」

「傅小姐。」從他自信的眼神，我知道他原來就是林醫師，有點愕然他居然這麼年青。

「噢！傅小姐你坐坐先。」打過招呼後他就召了那對情侶入房看症，無意竊聽，但房間牆壁薄如紙，原來，他也是鐵打師父。

好奇心使起，我起身在狹小的單位內參觀參觀，看看櫃上獎座，看看牆上剪報，發現這位林醫師來頭不少。

「傅小姐過黎呢度丫！」到我了！他喚我坐到廳中的書桌坐下。

「傅小姐，有咩可以幫到你？」他的聲音相當溫柔。

「我想調理一下身體。」看似健碩的我其實身體有甚多小毛病。

「想調理身體第一件事就唔可以著短裙啦，仲坐電單車添！女性膝頭位中醫角度叫做血海，要好好保護，唔可以冷親！多D著長褲著及膝裙！(下！及膝裙？唔係呀嘛！我最愛展示我雙肉腿㗎喎！及膝裙早已唔存在晌我衣櫃啦！)

「等我同你把把脈！」他靜靜地以三隻手指按著我的手碗，續道：

「你喉乾舌燥，成日好似好口渴，睇你扁桃腺脹脹地，有D喉嚨發炎。(中！)

「肚脹胃氣脹，(中！著咁大件褸你都睇到？) 個肚成日GILIGULU，食完野好多氣嗝，腸胃唔係幾好，尿有D濁，去廁所唔暢通，仲幾敏感，最近應該有肚痾黎。(又中！咁都聽到既咩？)其實你幾大胃口！ (囧rz！大食都知？？？)

「你又唔係虛到成日病，不過吹吹風都會見頭赤。」(係呀係呀！我唔吹得風扇㗎！登時諗起一套爛片，當踎低起身見頭暈同條脷舐唔到個鼻就係生CANCER咯。)

脈象究竟是哪門子玩意？為什麼把把脈就會知道身體各樣毛病？如何從幾聲噗噗、噗噗得知？

「唔好飲咁多湯，你太濕！」

「唔飲得湯？但我超中意飲湯喎！」說到此處，我忍不住開聲了！

「調理好個身體先，否則湯水你都唔吸收，要食D滋陰既野。但唔補得，身體太虛，唔受得！(之前深井個中醫都係咁講架！)

「千祈要放鬆！你教書就唔好比太大壓力自己，你好多病都係壓力屈出黎！調理唔好會惡化！

「所有生冷野要戒，魚生沙律果D唔好食啦，菜魚肉乜都得，最緊要食飯！」

「早餐食件芝腿治算唔算生冷呀？」簡直想喊！學校小食部只有芝腿治比較健康。

「你問我就最好食饅頭，外國麵包又牛油又芝士，多吃無益！

「我開五日藥比你托一托個底，五包藥粉，午餐晚餐後半包沖暖水飲左佢。」不知何時，四眼嬸嬸已預備好五包藥粉。

「咁順便問問呢，我呢度一伸腳就痛。」我指指右腳膝蓋。

「你伸縮幾下黎睇睇！你呢條筋有D脹，因為坐姿唔好，歪埋一邊，唔好撟腳，企都唔好咁企！」他突然站起，擺出一個很「我」的姿勢，心服口服！

「仲有仲有，我呢度好痕，係咪濕疹？」我伸出一雙肉臂，展示一冬天就痕到爆炸的皮膚。

「你呢D叫做風疹，西醫叫做皮囊發炎，簡稱皮膚敏感，天氣乾燥吹下風就起架啦，搽D CREAM冇事架啦！」

「嗯！唔該晒！R…… 幾錢呀？」心中還在想有什麼問題問。

「二百九十，下個禮拜再黎睇啦！呢張我咭片！」

中大中醫學院臨床導師
中大執業中醫師文憑
浸大中醫碩士
XXX醫局主診中醫師

後生可畏！

***********************************************************

離開林醫師後到大埔中心晚膳，習慣晚餐戒飯的我看著餐牌正正入神，羊先生說：

「睇你都係食飯架啦，米飯！」 -_-"

‧
‧